«PARYZ» мүшелері МКЗЖ алушылар тізбесін кеңейту мәселелерін талқылады
«PARYZ» Қазақстан Республикасы Ұлттық жұмыс берушілер конфедерациясы алаңында заңнаманы жетілдіру жөніндегі Консультативтік кеңестің отырысы өтті. Кездесу барысында жұмыс берушілер есебінен міндетті кәсіптік зейнетақы жарналары (бұдан әрі – МКЗЖ) төленетін қызметкерлер санатын кеңейтуге қатысты ұсыныстар қаралды.
Ұйым мүшелеріне ҚР Еңбек және халықты әлеуметтік қорғау министрінің 2023 жылғы 24 мамырдағы № 170 бұйрығына өзгерістер енгізу жөніндегі ұсыныстар таныстырылды. Аталған құжатта зиянды еңбек жағдайларындағы өндірістер, жұмыстар мен мамандықтар тізбесі белгіленген, солар үшін жұмыс берушілер өз қаражаты есебінен МКЗЖ аударады.
Ұсынылған өзгерістер еңбек қорғау және қызметкерлерді әлеуметтік қамтамасыз ету саласындағы құқықтық реттеуді жетілдіруге бағытталған.
Дайындалған жоба одан әрі қарау үшін уәкілетті мемлекеттік органға жолданатын болады.