«Қауіпсіз еңбек: жаңа сын-тегеуріндер мен цифрлық шешімдер» халықаралық көрме-форумы аясында Әлеуметтік әріптестік және әлеуметтік және еңбек қатынастарын реттеу жөніндегі республикалық үшжақты комиссияның отырысы өтті.
Іс-шараға ҚР Премьер-Министрінің орынбасары Ермек Көшербаев, ҚР Еңбек және халықты әлеуметтік қорғау министрі Светлана Жақыпова, Еңбек мәселелерін реттеу, еңбек инспекциясы және еңбекті қорғау жөніндегі халықаралық еңбек ұйымының маманы Дарко Дочинский, бірқатар орталық мемлекеттік органдардың, жергілікті атқарушы органдардың, республикалық кәсіподақтар мен жұмыс берушілер бірлестіктерінің өкілдері қатысты.
Әлеуметтік әріптестермен бірлесіп қауіпсіз еңбек жағдайларын қамтамасыз ету жөніндегі шаралар, Жұмысшы мамандықтар жылы шеңберінде жұмысшы кадрлардың тапшылығы бойынша іске асырылатын шаралар, сондай-ақ әлеуметтік әріптестік туралы салалық келісімдер жасасу бойынша жүргізіліп жатқан жұмыстардың нәтижелері талқыланды.
ҚР Премьер-Министрінің орынбасары Ермек Көшербаев білікті мамандардың тапшылығы мәселелеріне терең тоқталып, осыған байланысты техникалық және кәсіптік оқыту жүйесін дамыту қажеттігін атап өтті.
«Бүгінде елімізде білікті мамандардың, оның ішінде жұмысшы мамандық өкілдерінің тапшылығы байқалады. Бұл техникалық және кәсіптік оқыту жүйесін дамытудың маңыздылығын растайды, өйткені олар сұранысқа ие мамандарды, соның ішінде экономиканың түрлі салалары үшін жұмысшы кәсіптері бойынша даярлауда шешуші рөл атқарады. ТжКБ еңбек нарығының қажеттілігіне және мамандар тапшылығының орнын толтыруға бағдарлануы тиіс», – деп атап өтті Премьер-Министрдің орынбасары Ермек Көшербаев.
Отырыс барысында «Самұрық-Қазына» АҚ компаниясы білікті мамандарды даярлау бойынша өз тәжірибесімен бөлісті. Сонымен, компанияның 2025 жылға арналған Жұмысшы мамандықтар жылын өткізу жоспары аясында: жас мамандардың әлеуетін дамыту, кәсіпорындардағы теория мен практиканы біріктіретін дуальды оқыту, жұмысшы мамандардың біліктілігін арттыру.
«Жұмысшы кәсіптерін қолдау шаралары аясында ағымдағы жылы 4 200-ден астам қызметкер өздерінің кәсіби біліктілігін арттыруда. 50-ге жуық түлек оқуын аяқтап, жұмысқа орналасты. Қазірдің өзінде 880-ден астам студент Қор компанияларында өндірістік тәжірибеден өтуде. Біз Назарбаев Университетімен, КИМЭП, ҚБТУ, Сәтбаев және басқа да университеттермен және өңірлік колледждермен белсенді ынтымақтастық орнатудамыз. Нәтижесінде 1 700-ге жуық студент Қор кәсіпорындарында дуальді оқыту бағдарламасы бойынша жұмыс тәжірибесін алуға мүмкіндік алды», – деп «Самұрық-Қазына» АҚ Корпоративтік басқару, әлеуметтік-еңбек қатынастары және еңбекті қорғау жөніндегі басқарушы директоры Гибрат Ауғанов компания тәжірибесімен бөлісті.
ҚР Еңбек және халықты әлеуметтік қорғау министрі Светлана Жақыпова өз сөзінде қауіпсіз еңбек жағдайларын қамтамасыз ету тақырыбына егжей-тегжейлі тоқталып, бұл әлеуметтік әділеттілік пен ұжымдық жауапкершілік мәселесі екенін атап өтті.
«Еңбек қауіпсіздігі – бұл жұмыскер мен мемлекет арасындағы, бизнес пен қоғам арасындағы сенімнің негізі. Біз әрбір қазақстандық жұмысқа шығып, оның өмірі мен денсаулығы қорғалғанын сезінуі үшін жағдай жасауға міндеттіміз.
Бүгінгі таңда еңбек жағдайлары зиянды, әсіресе өнеркәсіпте және өндіруші секторда жұмыспен қамтудың жоғары деңгейі сақталуда. Бұл профилактикаға да, жұмысшылардың әлеуметтік қорғалуын күшейтуге де бағытталған кешенді шешімдерді қажет етеді.
Сондықтан біз біртіндеп бақылау ғана емес, сонымен қатар алдын алу, төлемдердегі әділеттілік, өтемақылардың қолжетімділігі және жұмыс берушілерді қауіпсіздікке инвестициялауға ынталандыру маңызды болатын жүйені құрып жатырмыз», – деп атап өтті министр Светлана Жақыпова.
Айта кетейік, 2025 жылы Дүниежүзілік еңбекті қорғау күнінің тақырыбы цифрландыру мәселелерімен ұштастырылған, сондықтан талқылау назарында – 2024-2030 жылдарға арналған қауіпсіз еңбек тұжырымдамасын және 2024-2030 жылдарға арналған өнеркәсіптік қауіпсіздік тұжырымдамасын іске асыру кезінде цифрлық өнімдерді енгізу.
Сонымен, форум алаңында еңбекті қорғау және өнеркәсіптік қауіпсіздік, оның ішінде цифрландыру және инновациялар бойынша үздік дағды мен озық тәжірибе ұсынылады. Сондай-ақ, іс-шара шеңберінде отандық тауар өндірушілердің және еңбек қауіпсіздігі және еңбекті қорғау саласындағы қызметтер нарығының бәсекеге қабілеттілігін арттыру мәселелері талқыланады.