«PARYZ» Қазақстан Республикасы Ұлттық жұмыс берушілер конфедерациясына мүше жұмыс берушілер, бизнес өкілдері мен салалық қауымдастықтар Еңбек және Кәсіпкерлік кодекстеріне енгізілетін, еңбек саласындағы мемлекеттік бақылауды күшейтуге бағытталған ҚР Еңбек және халықты әлеуметтік қорғау министрлігінің өзгерістер жобаларын талқылады.
Кездесу барысында қатысушылар мемлекет пен бизнестің өзара іс-қимылының алдын алу моделін дамытуға бағытталған бастамаларды қолдады. Атап айтқанда, бақылау субъектісіне бармай профилактикалық бақылау енгізу туралы ұсыныс – кеңес беру және ескерту құралы ретінде мақұлданды.
Сонымен қатар, қатысушылар жұмыс берушілердің адалдық декларациясын енгізу мен дамыту тетіктерінің маңыздылығын атап өтті. Бұл – құқықтық сананы ынталандыру мен жауапты бизнеске түсетін әкімшілік жүктемені азайтудың тиімді құралы ретінде бағаланды.
Сонымен қатар, бизнес-қоғамдастық өкілдері бақылауды шамадан тыс күшейтуге алып келуі мүмкін бірқатар ұсыныстарға бірыңғай қарсылық білдірді:
– жоспардан тыс тексерулер мен субъектіні барып профилактикалық бақылау жүргізу кезінде ескерту тәртібін алып тастау;
– тексеру парақтарын міндетті түрде қолданудан бас тарту;
– еңбек инспекторларына сот шешімінсіз қызметті тоқтату құқығын беру;
– еңбек заңнамасы саласындағы заңға тәуелді актілерді әзірлеу кезінде реттеушілік әсерге талдауды алып тастау.
Қатысушылар мұндай шаралар бақылау мен серіктестіктің арасындағы тепе-теңдікті бұзып, алдын алу шараларынан репрессивті тәсілге ауысуға алып келетінін және бұл үшжақты әріптестік пен әлеуметтік жауапкершілік қағидаттарына қайшы келетінін атап өтті. Сондай-ақ, жұмысшылардың өміріне нақты қауіп төндіретін өндірістік нысандарда қазірдің өзінде қатаң бақылау мен шұғыл әрекет ету шаралары іске асырылып жатқаны айтылды.
Халықаралық еңбек ұйымының №81 «Өндіріс пен сауда саласындағы еңбек инспекциясы туралы» Конвенциясы да ерекше назарға алынды. Бұл Конвенция тексеруді алдын ала ескертусіз жүргізуге рұқсат береді, бірақ ұлттық заңнамада ескерту тәртібін белгілеуге болады. Яғни, бұл тәсіл халықаралық стандарттарға қайшы келмейді.
Кездесу қорытындысы бойынша «PARYZ» Конфедерациясы мыналарды қамтитын теңгерімді ұстанымды ұсынды:
– конструктивті және алдын алу сипатындағы бақылау тетіктерін қолдау;
– жұмыс берушілердің адалдығы жүйесін дамыту;
– тексерулердің ескерту тәртібін сақтау;
– тексеру парақтарын міндетті түрде қолдану;
– қызметті тоқтату кезінде сот арқылы шешім қабылдау кепілдігін сақтау.
«PARYZ» Конфедерациясы еңбек саласында мүдделер тепе-теңдігі мен құқықтық тұрақтылықты қамтамасыз ететін шешімдерді әзірлеу үшін жұмыс берушілермен белсенді диалогты жалғастырады.